All for Joomla All for Webmasters

LYRIC

Dil yeh deta hai sada ab toh Madina dekhu
Ankhen roti hai Shaha Gumbad e Khazra dekhu

Sare tasleem kiya karta hai kham jis pe falak
Naaz karti hai zameen jis pe woh Taiba dekhu

Khana e Kaaba jhuka karta hai rauze ki taraf
Hai jaha Kaabe ka kaaba woh Madina dekhu

Dekho rehmat ka woh meezab ishara samjho
Hai nigaho me jo uski woh Madina dekhu

Masjid e Nabavi ki Mehraab o Minaar o Gumbad
Jaaliya unki sunehri mai hamesha dekhu

Mere sarkar ke qadmo ko hai chuma jisne
Baagh e Jannat ki woh Kyaari mai Khudaya dekhu

Hai kaha aisa ziya aur kahi duniya me
Us Dar e Paak ke zarro ka chamakna dekhu

Unke darbaar me faila ke mai daaman apna
Mere sarkar ki khairaat ka batna dekhu

Mere maula ho tasawwur ko woh parwaaz ata
Jab karu band mai ankhe toh Madina dekhu

Meri aankho me woh quwwat mere maula de de
Hind me rehke bhi sarkar ka Taiba dekhu

Noor e Amhed ki ziya se hai yeh aalam raushan
Noor se unke mai dil ka chamakna dekhu

Meri kismat me woh Ramzan bhi maula likh de
Ho sheher Makke me iftar ko taiba dekhu

Haazri teri bhi ho jayegi ek roz Khaleel
Laut kar phir se kahega ke Madina dekhu

Written By – Khalil Noorie.

ADVERTISEMENT